Dyshohet se gjyshi ngacmoi mbesën në Fier, babai i së miturës: Arrestimi i padrejtë, ngjarja, e stisur

Policia e Fierit arrestoi dje një 55-vjeçar me dyshimet se kishte ngacmuar seksualisht mbesën e tij 5-vjeçare. Sot, ka reaguar babai i vajzës. 31-vjeçari Ageljano Gjata thotë se situata është stisur nga ish-bashkëjetuesja e tij, për t’i marrë kujdestarinë e vajzës.

Ageljano thotë se nëna e ka braktisur të bijën që kur ishte foshnjë dhe shton se e vogla, tani 5 vjeçe, është rritur nga gjyshërit.

Banorët e fshatit Peshtan, ku jeton familja Gjata thonë se 55-vjeçari ka një sjellje korrekte, duke përmendur sakrificat që ka bërë për rritjen e mbesës.

Vladimir Gjata ndodhet në ambientet e komisariatit të Policisë Fier në pritje të seancës gjyqësore, për vlerësimin e masës së sigurisë.

Por babai i të voglës, këmbëngul se ai po mbahet në paraburgim për një ngjarje të stisur.

“Jam i shokuar”, thotë 31-vjeçari nga Peshtani, duke treguar se që në moshën 6 muajshe, e vogla është braktisur nga nëna e saj Ana.

Për shkak të kushteve të vështira ekonomike, ai ia ka besuar kujdesin gjyshërve të vajzës, ndërsa vetë është detyruar të largohet për të siguruar të ardhura.

Sipas tij, marrëdhënia gjysh-mbesë është shumë e afërt dhe e pandarë.

Në një takim të fundit në Fier, nëna ka pyetur vajzën nëse gjyshi e ngacmon, dhe e mitura ka thënë “po”, duke iu referuar vetëm fërkimeve në kurriz për ta ndihmuar të flejë.

Ageljano akuzon ish-bashkëjetuesen se po përpiqet të përfitojë nga situata për të marrë kujdestarinë e vajzës. Ai i bën apel drejtësisë të tregojë kujdes në gjykimin e një çështjeje kaq delikate

Babai i 5-vjeçares së mitur, Ageljano Gjata, thotë se aktualisht, vajza ndodhet në shtëpinë e të atit, ku kërkon dëshpërimisht gjyshin e saj.

Edhe banorët e fshatit Peshtan shprehen të tronditur dhe thonë se 55-vjeçari Vladimir Gjata nuk njihet për sjellje të tilla.