Një ngjarje e paprecedentë ka tronditur publikun e “Big Brother VIP Albania”, pasi konkurrenti Jozefin Marku ka ushtruar dhunë fizike ndaj banorit tjetër, Gjestit, menjëherë pas eliminimit nga shtëpia. Sipas raportimeve zyrtare, pas përfundimit të spektaklit të së premtes, Jozi ka reaguar në mënyrë agresive, duke e goditur Gjestin në ambientet jashtë shtëpisë.

Incidenti ndodhi pak çaste pasi të dy u eliminuan nga gara dhe dolën përpara publikut. Produksioni i emisionit reagoi menjëherë, duke njoftuar Policinë e Shtetit. Sipas Top Channel, forcat policore ndërhynë në vendngjarje dhe arrestuan Jozefin Markun, duke e shoqëruar me pranga në duar. Pamjet e këtij momenti u transmetuan në media, duke shkaktuar reagime të shumta nga publiku.

Nga ana tjetër, gjatë transmetimit të “Prime”-it u bë e ditur se gjendja shëndetësore e Gjestit është e stabilizuar dhe nuk paraqet rrezik për jetën.

Kjo ngjarje ka hapur debat të gjerë në rrjetet sociale mbi përgjegjësinë morale të konkurrentëve dhe ndikimin e dhunës në formate televizive. Ndërkohë, pritet një deklaratë zyrtare nga produksioni dhe një vendim për pasojat që do të ketë ky veprim për Jozi Markun në raport me rregullat e spektaklit dhe ligjin. /Telegrafi/