Një sherr i pazakontë ka ndodhur mbrëmjen e sotme në Durrës, pranë zonës së Muzeumit, ku sipas dëshmitarëve, disa vajza janë përfshirë në një përleshje të ashpër brenda makinës së tyre. Ngjarja ka shkaktuar kaos dhe bllokim të trafikut për më shumë se 10 minuta, ndërsa policia ka ndërhyrë me disa forca për të vënë situatën nën kontroll.
Sipas një mesazhi të ardhur në redaksinë e JOQ Albania, vajzat, të cilat ishin mbi 25 vjeçe, dyshohet se po ziheshin për një djalë që ndodhej në mes të konfliktit. Gjatë sherrit, ato thërrisnin emra të ndryshëm, duke bërë të qartë se konflikti kishte sfond personal.
Për të ndaluar përplasjen, sipas dëshmitarëve, në vendngjarje mbërritën disa furgonë dhe makina policie, por ndërhyrja u vështirësua për shkak se nuk kishte punonjëse femra që të kryenin shoqërimin. Vajzat, të cilat ishin të gjitha brenda së njëjtës makinë, jo vetëm që nuk ndaluan përleshjen, por dyshohet se arritën të kyçin dyert e automjetit, duke e bërë të pamundur që policia t’i nxirrte jashtë. Për minuta të tëra, efektivët nuk mundën të ndërhynin, ndërsa situata vijoi të përshkallëzohej brenda makinës.
Për shkak të sherrit, rruga u bllokua plotësisht, duke krijuar një kaos të madh në zonë.
Mesazhi i mbërritur në redaksinë e JOQ:
“Përshëndetje JOQ, policët bllokuan Durrësin për më shumë se 10 minuta për shkak të një sherri mes disa vajzave pranë Muzeumit. Ato ishin mbi 25 vjeçe dhe në konflikt ishte përfshirë edhe një djalë. Nga sa dukej, ato ziheshin për këtë djalin, pasi të gjitha thërrisnin emra gjatë përplasjes. U krijua shumë kaos dhe në vendngjarje mbërritën pesë furgonë dhe tre makina policie. Megjithatë, arrestimi ishte i vështirë, pasi nuk kishte punonjëse femra që të ndërhynin. Më shumë se katër vajza u përleshën brenda makinës së tyre, duke e bërë situatën edhe më kaotike. Për më tepër, ato kyçën dyert, duke penguar policinë që t’i nxirrte jashtë. Rruga u bllokua plotësisht dhe situata mbeti e tensionuar për një kohë të gjatë.”
