Pronari dhe dy punonjësit e restorantit janë arrestuar me akuzën për vrasje nga pakujdesia – Sot u morën në pyetje dhe u lanë të lirë deri në zhvillimin e gjyqit

Athinë – Një video tronditëse është publikuar, e cila tregon momentin kur dy punonjës të rinj të një restoranti në zonën e Omonias në Athinë, nxjerrin jashtë trupin e pajetë të një burri të pastrehë 57-vjeçar, dhe e lënë në mes të trotuarit, në mes të ditës.

Sipas informacionit nga in.gr, pamjet nga kamerat e sigurisë tregojnë burrin që futet i vetëm në restorant dhe më pas dy punonjësit, dy emigrantë nga Siria, 23 dhe 21 vjeç e nxjerrin atë të pajetë jashtë.

Ai kishte një plagë në kokë, e cila i ishte shkaktuar nga një rënie në shkallët që të çojnë në bodrum, ku gjendet tualeti i lokalit.

Pas pak minutash, dy të rinjtë e nxjerrin trupin jashtë dhe e lënë në trotuar. Menjëherë më pas, një punonjës tjetër pastroi zonën me ujë dhe zbardhues.

Sipas asaj që deklaruan fillimisht punonjësit e restorantit, ata e gjetën burrin jashtë lokalit. Megjithatë, kur u ballafaquan me pamjet filmike nga kamerat e sigurisë, ata pranuan se ai kishte hyrë në lokal dhe kishte shkuar në tualet. Aty ai kishte rrëshqitur dhe goditur kokën, duke humbur ndjenjat.

Pronari, pasi u njoftua për ngjarjen, i urdhëroi punonjësit që ta nxirrnin trupin jashtë, në vend që të njoftonin ndihmën e shpejtë.

Pavarësisht se kamerat nuk mbulojnë pjesën e shkallëve që të çojnë në tualet, veprimet e mëpasshme janë të qarta dhe tronditëse. Viktima nuk mori ndihmën e nevojshme dhe u la në rrugë.

Autoritetet arrestuan pronarin dhe dy punonjësit për vrasje nga pakujdesia. Ata u morën në pyetje nga policia dhe u lanë të lirë deri në zhvillimin e gjyqit, ndërsa restoranti është mbyllur përkohësisht. /noa.al