Në një valë të pandalshme krimesh dhe atentatesh, policia shqiptare ka regjistruar një tjetër “arritje” nën drejtimin e ministrit të Brendshëm, Ervin Hoxha: gjetjen e makinave të djegura që përdorin vrasësit për të kryer krimet e tyre. Ky sukses kaq “i madh” është bërë tashmë simbol i përpjekjeve të qeverisë për të luftuar krimin e organizuar. Jo kapja e autorëve, jo ndalimi i zinxhirit kriminal, por thjesht gjetja e disa makinave të braktisura dhe të shkrumbuara.
Makinat e djegura janë bërë suksesi standard i policisë, ndërsa vrasësit vazhdojnë të lëvizin të lirë, duke shijuar frikën që mbjellin në rrugët e qyteteve tona. Ndonjëherë duket sikur motoja e policisë ka kaluar nga “kape krimin” në “gjeje makinën”. Ndërkohë, qytetarët pyesin: A është kjo strategjia e madhe për sigurinë kombëtare? Të ndiqet tymi i gomave në vend të rrënjëve të krimit?
Kjo situatë vazhdon të ushqejë perceptimin e përgjithshëm se krimi i organizuar është një hap para forcave të rendit, duke shtuar ndjesinë e pasigurisë për qytetarët e zakonshëm. Ndërsa makinat e djegura mbeten një dëshmi kryesore, pyetja kryesore mbetet: kur do të kapen ata që ndodhen pas timonit?