Greqia po negocion me Izraelin për të zhvilluar një sistem të mbrojtjes ajrore dhe antiraketore me vlerë 2 miliardë euro, si pjesë e një plani të gjerë për modernizimin e forcave të saj të armatosura pas një krize të gjatë borxhi, deklaruan zyrtarët grekë të enjten.
Ky sistem pritet të ngjasojë me “Kupolën e Hekurt” të Izraelit dhe të tjera sisteme që përdoren për të ndaluar raketat me rreze të shkurtër dhe të gjatë.
Greqia po shikon mundësinë për të forcuar mbrojtjen për të mbajtur ritmin me aleatin e saj në NATO dhe rivalin historik, Turqinë, e cila gjithashtu po zhvillon sistemet e saj të mbrojtjes ajrore, pavarësisht përmirësimeve në marrëdhëniet midis dy vendeve.
“Plani është të krijohet një sistem shumë-shtresor për mbrojtje ajrore dhe kundër dronëve,” tha një burim pas një takimi me dyer të mbyllura me Ministrin grek të Mbrojtjes, Nikos Dendias. “Jemi në bisedime me Izraelin,” shtoi ai.
Një zyrtar i dytë konfirmoi vlerën e mundshme të marrëveshjes, duke theksuar se Greqia duhet të shpenzojë 12.8 miliardë euro deri në vitin 2035 për të modernizuar forcat e saj të armatosura.
Ky sistem i mbrojtjes ajrore është pjesë e një plani 10-vjeçar të Athinës për blerje ushtarake, që përfshin deri në 40 avionë të rinj F-35 dhe dronë nga SHBA, si dhe katër fregata Belharra dhe avionë Rafale nga Franca.
Aktualisht, Greqia përdor sistemet Patriot të SHBA dhe ato të vjetra ruse S-300 për të mbrojtur hapësirën e saj ajrore. Pavarësisht përmirësimeve të kohëve të fundit në marrëdhëniet e saj me Turqinë, dy vendet vazhdojnë të kenë mosmarrëveshje mbi kufijtë detarë, burimet energjetike dhe hapësirën ajrore në Mesdheun lindor.