Një vajzë 14-vjeçare me origjinë shqiptare humbi jetën mëngjesin e sotëm në rrugën “IV Novembre” në Piacenza, pasi ra nga tarraca e një papafingoje në katin e shtatë të një pallati. Ajo gjeti vdekjen e menjëhershme dhe policia ka nisur hetimet për të sqaruar rrethanat e ngjarjes, pa përjashtuar asnjë pistë. Një mik dhe disa bashkëmoshatarë të saj janë shoqëruar për t’u marrë në pyetje.
Prokuroria e Piacencës po përpiqet të sqarojë dinamikën dhe lëvizjet e të miturës para se të ndodhte tragjedia. 15-vjeçari, që ishte me të atë mëngjes, ka njoftuar fqinjët për ndihmë dhe aktualisht po merret në pyetje nga grupi hetimor. Pista e ngjarjes aksidentale mbetet ende e hapur, ndërsa hetuesit po përqendrohen në dëshmitë e të miturve që kanë qenë në kontakt me vajzën.
Fqinjët e kanë përshkruar si një tragjedi të rëndë, ndërsa shoqet e vajzës, pasi përfunduan shkollën, u mblodhën para banesës së saj dhe lëshuan tullumbace të bardha në shenjë homazhi.