I hoqën lirinë një 53-vjeçari dhe e kanosën për t’i marrë një shumë parash, pas reagimit të shërbimeve të Komisariatit të Policisë Gjirokastër, identifikohen dhe arrestohen 2 autorët e dyshuar, si dhe sekuestrohen një shumë parash dhe 2 celularë.
Shërbimet e Komisariatit të Policisë Gjirokastër, morën njoftim se 2 shtetas i kishin hequr lirinë, një 53-vjeçari, duke e mbajtur kundër vullnetit të tij si dhe e kishin kanosur me qëllim dhënien e një shume parash.
Forcat policore kanë organizuar punën për kapjen dhe vënien e autorëve të dyshuar përpara përgjegjësisë ligjore.
Si rezultat i veprimeve të shpejta të specialistëve për Hetimin e Krimeve të Komisariatit të Policisë Gjirokastër, janë identifikuar, kapur dhe arrestuar autorët e dyshuar, shtetasit:
Lavdije Çaushi, 45 vjeçe, banuese në Gjirokastër dhe Edi Tafili, 38 vjeç, banues në Krahës, Memaliaj.
Ata akuzohen për veprat penale “Heqja e paligjshme e lirisë”, “Shtrëngimi me anë të kanosjes ose dhunës për dhënie pasurie”, kryer në bashkëpunim.
Nga veprimet hetimore dyshohet se këta 2 shtetas, për motive të dobëta, kanë mbajtur në banesën e marrë me qira nga 45-vjeçarja, shtetasin P. S., 53 vjeç, duke i hequr lirinë atij, si dhe e kanë kanosur për dhënie pasurie.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.