Në pranverën e vitit 2019, Marie Trainer u kthye në shtëpinë e saj në Ohio pas pushimeve në një plazh tropikal, pa e ditur se jeta e saj do të ndryshonte për gjithmonë. E pritur me përqafime dhe puthje nga qeni i saj i dashur, Marie nuk e vuri re fare që kishte një plagë të vogël të hapur në dorën e saj, e shkaktuar nga një prerje. Gjithçka dukej normale, derisa pas disa ditësh filloi të ndihej keq.
Në katër ditët e ardhshme, shëndeti i saj u përkeqësua, duke e detyruar bashkëshortin e saj, Matt Trainer, që ta dërgonte në spital.
“Nuk ndihesha mirë dhe situata vetëm sa po përkeqësohej,” kujtoi ajo. Pasi mori trajtim mjekësor, Marie ra në koma dhe mjekët zbuluan se ajo kishte marrë një infeksion të rrallë, të shkaktuar nga një bakter i quajtur capnocytophaga canimorsus.
Çfarë është capnocytophaga canimorsus? Sipas Qendrës për Kontrollin dhe Parandalimin e Sëmundjeve, ky bakter gjendet zakonisht në pështymën e qenve dhe maceve. Nëse hyn në trupin e njeriut, ai mund të shkaktojë një infeksion të rrallë, por potencialisht fatal. Në rastin e Marie-së, besohet se bakteret hynë në organizmin e saj përmes një lëkure të hapur të lëpirë nga qeni i saj, duke shkaktuar komplikime të rënda si sepsis, dështim të veshkave dhe mpiksje të gjakut.
Kur Marie u zgjua disa ditë më vonë në spital, ajo zbuloi se të dyja këmbët dhe duart i ishin amputuar. Infeksioni kishte shkaktuar mpiksje të shumta gjaku në gjymtyrët e saj, duke i çuar ato në gjendje nekrotike.
Dr. Ajay Seth, mjeku që e trajtoi, shpjegoi se duart dhe këmbët e saj kishin filluar të nxiheshin me shpejtësi. Ndërsa fillimisht ishte sugjeruar që të katër gjymtyrët e saj të hiqeshin nga trupi, Dr. Seth bëri gjithçka të mundur për të shpëtuar sa më shumë të ishte e mundur, në mënyrë që Marie të mund të përdorte protezat.
Një rrugëtim i gjatë drejt rikuperimit Marie i amputuan të dyja këmbët mbi gju, por ajo arriti të mbante një pjesë të madhe të duarve të saj. Pas pesë vitesh rikuperimi, ajo ka arritur të mësojë të ecë përsëri dhe sot përdor proteza të sofistikuara. “Ka qenë sfiduese,” thotë ajo. “Mësimi për të ecur ishte pjesa më e vështirë, por tani gjërat po ecin shumë mirë.”
Marie tani mund të kryejë aktivitete si kopshtaria dhe vizatimi falë protezave mioelektrike. I emocionuar për progresin e saj, burri i saj shprehet: “Kur e shoh duke ecur, them ‘Zoti im, kjo është e pabesueshme’. Ne e shohim dritën në fund të tunelit, thjesht duhet të planifikojmë më shumë kur duam të bëjmë diçka.”
Dr. Seth e përshkruan rikuperimin e saj si një mrekulli teksa thotë: “Progresi që ka bërë në pesë vite është i pabesueshëm.”
