Shqetësim i madh në Spanjë për incidentin e tmerrshëm, në të cilin u përfshi i ati i Lamine Yamal, yllit të Barcelonës dhe kombëtares iberike, i goditur me thikë, pa mundësinë e mbrojtjes. Ai përfundoi në gjendje të rëndë në spital, por për fat të mirë jo në rrezik për jetën.
Mounir Nasraoui u godit me thikë disa herë midis orës 9 dhe 10 të mbrëmjes së djeshme në një park makinash në lagjen “Rocafonda” të Mataró, qyteti në Katalonjë ku ai jeton. Meqenëse gjendja e tij u shfaq menjëherë e rëndë, babai i xhevahirit 17-vjeçar të Barcelonës u transferua në urgjencën e spitalit “Can Ruti” në Badalona.
Për momentin nuk është në rrezik jeta e tij, mjekët thonë se është në gjendje të qëndrueshme. Një video e publikuar orët e fundit në rrjetet sociale tregon përleshjen në rrugë, të ndodhur disa orë më parë, e cila do të ishte baza e sulmit brutal të mëpasshëm që pësoi babai i 17-vjeçarit, fitues i Kampionatit Europian kësaj vere.
Incidenti ndodhi rreth orës 15:45 dhe përfshiu njerëz të tjerë vendas, ku u rrit edhe Lamine Yamal, si dhe Mounir Nasraoui. Debati shpërtheu pasi një grup burrash të zhveshur në mes e lart bërtitën dhe hodhën ujë ndaj babait të futbollistit nga një ballkon, teksa ai po ecte me qenin e tij në Mataró. Në video, burri, i veshur me një fanellë futbolli të Barcelonës, me emrin e djalit të tij në shpinë, shihet duke debatuar me një grup njerëzish që qëndrojnë para një dere.
https://x.com/i/status/1823848241571705131
Një burrë tjetër e pengon atë të arrijë grupin dhe më pas e largon nga ajo situatë potencialisht e rrezikshme, pasi ka marrë diçka nga toka dhe ia ka dhënë përsëri Nasraouit. Në këtë moment shohim se policia ndërhyn, duke e shtyrë burrin edhe më larg, pas një kamioni, ku babai i Yamal fillon të gjestikulojë dhe të shpjegojë dukshëm versionin e tij të ngjarjeve. Disa orë pas këtyre ngjarjeve, burri u godit disa herë me thikë pas shpine në mbrëmje, në një parking makinash aty pranë, dhe u dërgua me urgjencë në spital.
Njësia hetimore e “Mossos d’Esquadra” e Mataró e mori menjëherë çështjen në dorë dhe tre burra tashmë janë arrestuar me akuzat për “vrasje të mbetur në tentativë”, falë dëshmive të atyre që panë therjen me thikë. Ndërhyrja e policisë ishte e menjëhershme dhe masive. Gjithsej tetë automjete nga “Mossos d’Esquadra” dhe Policia Bashkiake morën kontrollin e zonës për të kryer marrje në pyetje dhe arrestime, të cilat mund të mos kenë përfunduar me kaq.
Nasraoui, reagimet e të cilit për Kampionatin e fundit Europian të fituar nga Spanja, në të cilin Yamal ishte protagonist i madh, u bënë “virale” për bujën e tyre spontane, ka pasur tashmë probleme me ligjin në të kaluarën. Në qershor të vitit të kaluar u bë tituj mediash dhe u detyrua të paguante një gjobë prej qindra eurosh, pasi sulmoi një tezgë të partisë së ekstremit të djathtë “Vox” gjatë fushatës zgjedhore.
Historia dramatike që përfshin babain e tij nuk është sigurisht mënyra më e mirë për Lamine shumë të ri, për t’u përgatitur për debutimin e tij sezonal në La Liga, që do ta shohë Barcelonën jashtë fushe të shtunën në mbrëmje, në “Mestalla” kundër Valencias. Ndërkohë, mbetet për t’u parë nëse ai do të jetë në gjendje të stërvitet rregullisht. Padyshim për momentin prioriteti i tij kryesor është gjendja e babit Mounir.