Edhe pse pritshmëritë kanë qenë për një rritje të konsumit në bare dhe restorante gjatë muajit gusht, situata deri më tani paraqitet e vështirë për këto struktura.
Në kulmin e sezonit turistik, në mes të gushtit, baret dhe restorantet kanë raportuar një rënie të konsumit krahasuar me të njëjtën periudhë të vitit të kaluar.
Ekspertët thonë se konsumi në këto biznese është ulur mesatarisht me 20%. Arsyeja kryesore është largimi i vendasve jashtë Shqipërisë gjatë sezonit turistik dhe ardhja e turistëve “low cost”, të cilët shpenzojnë më pak.
”Rënia e konsumit në bare dhe restorante është e përgjithshme në gjithë zonat turistike. Kjo për shkak të shpopullimit të shpejtë dhe shtimit të linjave ajrore low cost që nuk mund të sjellin turistë të kategorisë A”.
Rënia e konsumit është vënë re në të gjitha zonat turistike, duke reflektuar një ndryshim në përbërjen e turistëve dhe ndikimin e ekonomisë së tyre.
Ndërkohë, shitjet e pijeve alkoolike dhe verërave të prodhimit vendas janë përqendruar më shumë në supermarkete sesa në hotelet, restorantet dhe sektorin e kateringut. Edhe vetë prodhuesit vendas raportojnë një rënie të kërkesës edhe në këtë sektor krahasuar me një vit më parë.