Në vijim të hetimeve lidhur me vdekjen tragjike të Egli Progës në Pogradec, Prokuroria e Korçës ka nisur procedimin ndaj një polici patrulle.
Prokuroria e ka akuzuar policin e patrullës për sjellje të papërshtatshme ndaj një të afërmi të viktimës gjatë kohës që ndodheshin në spital, duke i thënë:“Ik mor andej ti pijanec”.
Edhe pse polici i patrullës nuk ka asnjë mundësi për të ndikuar në hetimin e rastit, sepse këtë e bën OPGJ, policia kriminale dhe prokuroria, “koka e tij” është e para që “pritet” pas vrasjes së 42-vjeçarit Eglantin Proga.
Duke përdorur policin si “kurbanin e parë”, Prokuroria po përpiqet të tregojë se fajtorët do zbulohen edhe pse fajin më të madh e ka vetë, pasi i lehtësoi akuzën vrasësit Denis Meçe, nga “vrasje me dashje” në “vrasje nga pakujdesia”.
Që nga zbardhja e vrasjes pas raportimit të qytetarëve në JOQ ALBANIA e deri më tani, Policia dhe Prokuroria po i hedhin “topin e fajit” njëra tjetrës.
Në fillim ishte akuza e ndryshuar, ndërsa tani në skenë ka dalë edhe “arrestimi” e “vetëdorëzimi” i autorit.
Ka dyshime se këto lojëra fjalësh mes këtyre organeve janë thjesht për të zbehur vëmendjen mbi autorin dhe fajtorët dhe harresën e vrasjes tragjike, ashtu siç ka ndodhur edhe me raste të tjera.