Nga 1 Shtatori, ishulli i Sazanit, një prej destinacioneve turistike më të njohura në vend do të mbyllet për vizitorët. Vendimi, është pjesë e përgatitjeve për transferimin e ishullit tek kompania ndërtuese e Jared Kushner, dhëndri i ish presidentit të SHBA-ve, Donald Trump.
Ishulli i Sazanit, i cili ka një histori të pasur dhe një natyrë të jashtëzakonshme, ka tërhequr turistë vendas dhe të huaj për vite me radhë. Me ujëra kristal të pastra dhe peizazhe të bukura, ishulli ka qenë një vend i preferuar për pushime, eksplorime dhe aktivitetet detare. Megjithatë, urdhri i ri që e mbyll ishullin për vizitorët shënon një pikë kthese në historinë e tij të fundit si destinacion turistik.
Kompania amerikane Affinity Partners e Jared Kushner planifikon të zhvillojë një projekt të madh në ishull. Ndërsa detajet e sakta të projektit ende nuk janë bërë publike, përflitet se plani mund të përfshijë ndërtimin e një kompleksi luksoz, me hotel, vilë private, dhe ndoshta një marinë për jahte.
Ky projekt pritet të sjellë një ndryshim të madh në peizazhin e ishullit. Ndërkohë projekti ka nxitur debate në opinionin publik, pasi mund të dëmtojë ekosistemin e ishullit dhe të humbasë trashëgiminë kulturore dhe historike që ai mbart.
Sazani ka qenë një zonë e mbyllur për shumë dekada gjatë periudhës komuniste, duke shërbyer si bazë ushtarake, dhe hapja e tij për publikun ishte një mundësi unike për të eksploruar këtë pjesë të veçantë të historisë shqiptare.