Views: 0
Nëna e 27-vjeçares e cila ditën e djeshme tentoi të mbytej në lumin Buna bashkë me katër fëmijët e saj, ka treguar detaje të reja nga tragjedia e shmangur.
Duke folur për mediat, ajo tha se vajza vuan prej 9 vitesh nga bashkëshorti me të cilin është në prag divorci pasi ai ka një lidhje të dytë njëkohësisht.
Ajo tha se dje 27-vjeçarja pasi u largua nga shtëpia bashkë me fëmijët, i dërgoi një mesazh duke i thënë se ndodhen tek ura e Bunës dhe familjarët kanë njoftuar policinë para se ajo të kryente aktin e rëndë.
Nëna e 27-vjeçares thotë se dhëndri pak muaj më parë i ka drejtuar armën vajzës së saj duke e kërcënuar, ndërsa gjatë gjithë këtyre viteve ka ushtruar dhunë ndaj saj.
Ajo kërkon që dhëndri të arrestohet sa më parë pasi është shkaktari i kësaj ngjarje dhe vajza e ka denoncuar disa herë në polici.
“Vajza kishte ardhur tek shtëpia jonë për shkak të problemeve që bashkëshorti i ka sjellë për 9 vite me radhë. Ne e kemi mbështetur gjithmonë vajzën dhe do vazhdojmë ta mbështesim pavarësisht situatës së vështirë. Po bënim një diskutim me vajzën sepse donte të bënte një aplikim në e-albania tek bashkia Shkodër për strehim por më tha se nuk kam lekë. I thashë t’i japë unë. Në diskutim e sipër mori fëmijët dhe doli jashtë. Këtë gjë e ka bërë disa herë. Pas pak kohësh na dërgoi një audio mesazh dhe tha se jam te ura e Bunës. Në atë moment njoftuan policinë, erdhën menjëherë dhe arritëm ta gjejmë. Nuk arrita të flas me vajzën sepse nuk na lejoi policia. Më pas në komisariat i ka dhënë dorën, i putha fëmijët dhe i dhashë 20 mijë lekë të vjetër sepse aq kisha. Më kanë thënë se është në një qendër por nuk e di se ku, nuk kam komunikuar ende me vajzën. Vajza ka ikur nga shtëpia sepse bashkëshorti i saj kishte një lidhje të dytë me një grua tjetër edhe ajo me katër fëmijë. E ka kërcënuar disa herë vajzën time dhe e ka lënë të vetme me 4 fëmijë duke i thënë dil nga shtëpia. Madje e ka kërcënuar edhe me armë para disa muajsh. Vajza e ka denoncuar por nuk është marrë asnjë masë. Bashkëshorti ka dhunuar fëmijët dhe ka ushtruar edhe dhunë psikologjike ndaj vajzës time. Kjo histori vijon prej vitesh. Vajza ka qenë edhe në një qendër strehimi në Tiranë dhe ka patur urdhër mbrojtje por bashkëshorti i saj ka shkuar atje edhe pse nuk lejohej dhe ka takuar fëmijët. Madje ajo qendra tre ditë përpara se të dilte sepse 6 muaj ishte afati ia ka mbushur mendjen vajzës që të ribashkohet me bashkëshortin. Më përpara donin ta nxirrnin nga aty duke i thënë që shih e gjej një punë e shtëpi në një kohë që ajo është me katër fëmijë dhe nuk ka si të punojë. Shteti është në dijeni të gjithë kësaj historie por gjithë këto vite nuk kanë bërë asgjë”,
Po ashtu, ajo i bën apel shtetit që ta ndihmojnë vajzën e saj për t’i gjetur një shtëpi për ta strehuar sepse është me katër fëmijë të vegjël duke u divorcuar.
“Ne jemi në kushte të vështira ekonomike. Burri im është me një kemp, unë mundohem të punoj dhe herë më paguajnë herë jo. Kërkoj që shteti të vendos dorën në zemër dha ta ndihmojë vajzën timë dhe katër fëmijët e saj të mitur. Kërkoj që t’i gjendet një shtëpi për strehim sepse ne e kemi të pamundur dhe po ashtu sa munden ta ndihmojnë. Ajo është me katër fëmijë dhe duhet që t’i përgjigjet, nuk ka se si të punojë. I kërkojmë shtetit që të reagojë ndaj gjithë kësaj situate dhe të gjendet një zgjidhje për vajzën time dhe fëmijët”.
Vlen të thuhet se kjo tragjedi e shmangur në kohë i ngjason asaj të ndodhur pak muaj më parë, po nē lumin Buna. Alma Arrazi i dha fund jetës së saj bashkë me 3 fëmijët e mitur për shkak të problemeve me bashkëshortin dhe lidhjes jashtëmartesore që ai kishte.