Një 23-vjeçar shqiptar ka ndërruar jetë mesditën e së dielës së 14 korrikut pasi dyshohet se ka pësuar goditje nga nxehtësia.
Ngjarja e rëndë ka ndodhur në Evia dhe sipas mediave greke, 23-vjeçari shqiptar ishte një person me nevoja të veçanta, i cili jetonte me familjen në Amarynthos të Evias. Petrit dhe Vezire Elezi 56 dhe 48 vjeç nga Durrësi, kanë gjetur brenda automjetit të tyre, të lënë të parkuar dhe të pasiguruar jashtë banesës, djalin e tyre Skerdi Elezi 23 vjec, i cili ishte pa ndjenja.
Ai është dërguar në spitalin e Kalkidës me urgjencë, por pavarësisht përpjekjeve të mjekëve për ta mbajtur në jetë, i riu ka ndërruar jetë mbrëmjen e së dielës.
Nuk dihet se në çfarë rrethanash 23-vjeçari ka pësuar goditje nga vapa, megjithatë policia ka arrestuar prindërit e tij, të cilët kanë një restorant në këtë zonë.