Views: 0
Është makthi më i madh për prindërit: fëmija i tyre zhduket pa lënë gjurmë. Familja Slater nga veriperëndimi i Anglisë duhej të duronte pikërisht këtë tmerr. Jay Slater, 19 vjeç, nuk u kthye në hotelin e tij pas një shëtitje në ishullin spanjoll të Tenerife më 17 qershor. Adoleshenti ishte i zhdukur prej 1 muaji, teksa një trup është gjetur në rajonin ku i riu britanik u zhduk pa lënë gjurmë.
Familja e Jay tashmë është informuar dhe policia e Lancashire konfirmoi gjithashtu kontaktin me autoritetet në Tenerife. Teksa pritet të kryhet autopsia, policia beson se i riu ka vdekur pasi ka rënë në zonën e pjerrët dhe të paarritshme ku u gjet trupi i tij.
Adoleshenti u zhduk kur hipi në makinë me dy persona të panjohur pasi kishte marrë pjesë në një koncert. Të nesërmen, e dashura e tij mori mesazhin e fundit nga 19-vjeçari. Pas festivalit, dyshohet se ai shkoi në vilën e dy të panjohurve, e cila ndodhet në parkun e largët kombëtar. Prej aty ai mori rrugën për në shtëpi në këmbë.
Familja e Slater udhëtoi menjëherë për në Tenerife pas lajmit të tmerrshëm për të ndihmuar autoritetet në kërkim të djalit. Rreth 15 anëtarë të familjes dhe miq të tij zbarkuan në Tenerife. Me të mbërritur në Spanjë, nëna e tij mori papritur një mesazh shqetësues në Snapchat.
Mesazhi, i cili duket se vinte nga llogaria e djalit të saj, thoshte: “Thuaji lamtumirë djalit tënd, nuk do ta shohësh më, ai më ka borxh shumë para”.
Nëna e dëshpëruar i tha Daily Mail se djali i saj nuk do të bënte “marrëzi”. Ajo kishte frikë se djali i saj ishte rrëmbyer.
“Kam një ndjenjë të keqe. Besoj se po mbahet kundër vullnetit të tij. Ai nuk është një djalë budalla. Ai nuk do të kishte vrapuar nëpër male”– tha ajo.
Ekipe të ndryshme shpëtimi dhe grupe kërkimi nisën operacionin duke përdorur edhe qen kërkimi. Policia kontrolloi me përpikëri në perëndim të ishullit. Ndërkohë, ekipet e shpëtimit kontrolluan edhe vendpushimet turistike në lindje të ishullit. Kjo bazohet në një informacion që Jay është parë në një taksi në shëtitoren në “Playas de las Américas”. Por kjo nuk u konfirmua. Familjarët dhe miqtë akuzuan policinë për humbje të kohës së vlefshme.
“Nëse Jay do të ishte shfaqur, ai do të kishte telefonuar nënën e tij ose një prej nesh. E njoh mirë dhe nuk do të donte që ne të shqetësoheshim. Dikush po përpiqet të shpërqendrojë policinë”, tha e dashura e tij për Daily Mail.